بسم الله الرحمن الرحيم
البارحة ماذقت لذة لنومي *** نومي تقاطيع وقلبي به هموم
ضاقت بي الدنيا وهدت عزومي *** وحيد لاوالي مريض ومحروم
اطلب من المولى يشافي سقومي *** ويعود لي من عقب ماني بمحروم
رب وهب عيسى لمريم رحومي *** واعاد موسى عقب ماهو بمحروم
وهب لي الوافي وفرج همومي *** وخو عزيز ومخلص دايم الدوم
رشيد ابو خالد وفى باللزومي *** وعياله الوافين شجعان وقروم
وابو فهد ياعل عمره يدومي *** جمايله ماانساه من اول الى اليوم
عياله عيالي شايلين همومي *** دايم معي ولاتخلو عني يوم
وابو حسن جار عزيز محشومي *** عصب فرض قدره علي دايم الدوم
ماهو غثيث ولا ردي العزومي *** جزل الى مني نصيته بملزوم
ولا هو من اللي ينقلون العلومي *** سماتته ماحطته موضع اللوم
يفهم قوانين العرب والسلومي *** ويقوم بالواجب الى جاه ملزوم
يالله يامنشي ثقيل الغيومي *** تجعل لهم رزق ميسر على الدوم
وختامها صلو صلاة تدومي *** اعداد مخلوق وهب لذة النوم
وعداد حبات الرمل والنجومي *** على شفيع الخلق يوم بعد يوم
راعي بلدة جفيفاء